Дундговь аймгийн прокурорын газраас зонхилон үйлдэгдэж байгаа гэмт хэргийг бууруулах чиглэлээр үе шаттай арга хэмжээг авч ажиллаж байна.
2024 он гарснаас хойш цахим сүлжээгээр бусдад залилуулсан гомдол мэдээлэл өмнөх оны мөн үеэс 1 дахин өссөн бөгөөд 40 гаруй хүн 372 сая төгрөгөөр хохирчээ. Иргэдийн цахим хэрэглээ нэмэгдэхийн хэрээр цахим орчинд залилуулах тохиолдол буурахгүй байна.
Цахим орчинд залилан хийж байгаа хүмүүс ихэвчлэн иргэдийн хамгийн ихээр ханддаг орон нутгийн пэйж хуудсуудад зар мэдээлэл байршуулж, бусдыг залилдаг байна. Тухайлбал, буцалтгүй тусламж олгоно, хямд машин зарна, жолооны эрх сэргээнэ, зээл гаргаж өгнө гэсэн зарын дагуу иргэд урьдчилгаа төлбөр шилжүүлж хохирчээ. Тиймээс иргэдийн эрх зүйн мэдлэгийг дээшлүүлж, цахим залиланд өртөхөөс урьдчилан сэргийлэх зорилготой нөлөөллийн арга хэмжээнүүдийг орон нутагтаа зохион байгуулжээ.
Цахим залилангийн гэмт хэрэг буурахгүй байгаагийн нэг шалтгаан нь иргэдийн хайхрамжгүй байдалтай холбоотой. Энэ төрлийн гэмт хэргийн хохирогч болохгүйн тулд сэрэмжтэй хандаж, сайтар нягталж байхыг тус прокурорын газраас уриалж байна.
Улсын Ерөнхий Прокурорын Газар
